Reklam büdcəsinin hər qəpiyinin dəyərini bilən şirkət qoyduğu reklamın auditoriyasına da həssas yanaşsın gərək.

Auditoriyanın idarə edilməsini öyrənmək üçün hazırda onlarla vasitə olmağına baxmayaraq hazırda hətta böyük şirkətlərin, holdinqlərin, bankların, telekommunikasiya şirkətlərinin qoyduqları reklamda ən primitiv səhvləri belə görə bilirik.

Məsələn, ölkəmizdəki telekommunikasiya şirkətlərindən biri bu yaxınlarda müştərilərə 10gb-lıq tarifinin reklamını aparırdı. Kampaniya heç də bütün abunəçiləri üçün nəzərdə tutulmurdu. Yəni, siz kombo və s. tarifindəsinizsə bu kampaniya sizə görə deyil. Və kampaniyaya auditoriya olaraq şirkət öz müştərilərini ayrıca nəzərə almalı halda, insanları sadəcə yaş/cins, şəhər üzrə target eləməyi nəzərdə tutmuşdu.

Nə baş verir, abunəçi olaraq sizə çox sərfəli internet paketinin reklamı çıxır, ancaq siz bu tarifdən istifadə edə bilməzsiniz. Halbuki, şirkət custom audience yaradaraq kampaniya xaricində olan müştəriləri exclude edə bilərdi. Həm büdcəsini daha dəyərli istifadə edərdi, həm də müştərisini durduq yerdə ruhdan salmazdı.

Etdiyimiz auditoriya seçiminin bu qədər kritik olması üçün heç də milyonlarla müştərisi olan şirkətdə işləməyinizə ehtiyac yoxdur. Məsələn, bu yaxınlarda bir şirkət etdiyi araşdırmanın nəticəsini paylaşmaq üçün reklam yerləşdirib. Ancaq, auditoriya seçimi zamanı reklamla/reklamsız bu araşdırmanı oxuyan insanları auditoriyadan exclude etməyib. Nəticə necə olur? Siz reklam sayəsində araşdırma mətnini oxumusunuz, ancaq sizə onun reklamı gəlməkdə davam edir. Reklam büdcəsi də səmərəsiz istifadə olunmuş olur.

Bu örnəyi yaza-yaza bitirmək olmaz. Facebook-da traffic reklamı verib saytında pixel-i quraşdırmayan holdinqlər, conversion üçün reklam verib amma müraciətin yekunlaşmağını Facebook-a bildirmək üçün nə event nə də url-i uyğunlaşdırmayan banklar, Facebook-da Digital marketinq kursunun elanını verib amma müraciət formunu Google Form-da formalaşdıran şəxslər və s. Halbuki bu şirkətlər saytlarına girib onlar üçün dəyərli action-u almayan müştəriləri daha uyğun büdcələrlə geri qaytarıb reklam xərclərini optimallaşdıra bilərdilər. Halbuki conversion reklamı sayəsində reklamlarının, bəyəndikləri vizualın həqiqətən müştəri üçün də əhəmiyyət kəsb edib etmədiyini görə bilərdilər. Nəticədə reklam büdcələrini də doğru formada optimize edə bilərdilər.

Reklamları idarə edən zaman buraxılan səhvlərdən ən gözə dəyəni isə sözsüz ki beynəlxalq şokolad şirkətlərindən birinin ölkəmizdə Novruz xonçası ilə bağlı reklamları idi. Reklam metrolarda, sosial mediada da yeləşdirilmişdi. Belə görünür ki, reklam ancaq Instagram üçün nəzərdə tutulmuşdu deyə, Facebook-da səhifə ilə bağlı heç bir iş görülməmişdi. Yəni, səhifənin məlumatları, profil şəkli belə yox idi. Ancaq reklam Facebook-da da davam edirdi. İnsanlar neqativ, pozitiv rəylər də yazırdılar. Çox güman ki, şirkətin itirdiyi imic, itirdiyi imkanlar, gəlirlər, bəlkə də elə bu postlarla bağlı elə indinin özündə də heç bir məlumatı yoxdur.

Numrəddin Hüseynov, Dijital Marketinq Mütəxəssisi