“Ketrinq bazarında qiymətlərin bazara uyğun olaraq artması gözlənilir. Təbii ki, söhbət şişirdilmiş qiymətlərdən getmir”.
Facemark.az-a bu sözləri “Lime Catering” şirkətinin Biznesin İnkişafı Departamentinin direktoru Ulduz Aslan deyib.
Ulduz Aslan bildirib ki, qiymətlərin artması bazarı inkişafdan salmayacaq: “Ketrinqdə müştərilərin artımı hiss edilir və bazar daha yaxşıya doğru gedir. Şirkətlər işçilərin qida ilə təmin edilməsi məsələsini ketrinqə həvalə etmək istəyirlər. Ketrinq bazarında qiymətlər artmaq məcburiyyətindədir.
Çünki bazarda bütün ərzağın qiymətlərinin artdığı vaxtda, ketrinqdə qiymətin artmaması imkansızdır. Bazar inkişaf edir, ketrinq biznesində olan insanlar da qazanmaq istəyirlər. Məncə, qiymətlərin artması bazarı inkişafdan salmayacaq”.
Azərbaycanda restoran və ketrinq bazarının gələcəyindən danışan Ulduz Aslan qeyd edib ki, insanlar həyat tərzlərinin dəyişməsi ketrinq və restoran biznesinin də gələcəyini optimist edib: “İnsanlar həyat tərzində dəyişiklik müşahidə edilir. Məsələn, əvvəllər insanlar vaxtlarının çoxunu dost, yaxınlarının evində keçirməkdə maraqlı idilər. Bu gün isə müşahidə edirik ki, insanlar sosial olmağa meyl göstərirlər. Bu nüanslar restoran və ketrinq biznesinin gələcəyini daha optimist edir. Mən inanıram ki, rəhbərlər işçilərinin qida ilə təmin edilməsi məsələsini ketrinq xidmətlərinə həvalə edəcəklər. Necə deyərlər çörəyi, çörəkçiyə verəcəklər. Açığı ümidliyəm, məncə hər şey yaxşı olacaq”.
Mütəxəssis bildirib ki, son beş ildə insanlar ictimai iaşə mədəniyyətində müsbətə doğru dəyişikliklər baş verib: “Daha əvvəllər insanlar ketrinqdən restoran xidməti gözləyirdilər. Ya da sevmədikləri xidməti çox kobud şəkildə ifadə edirdilər. Amma son zamanlar bu problemlər aradan qalxıb. Müştərilər başa düşür ki, ketrinq hansı xidmətləri insanlara təklif edir”.
O, iş prosesində qarşılaşdığı yaddaqalan hadisələrdən də danışıb: “Məsələn, belə bir situasiya ilə rastlaşmışdım. Müştəri xidmət xəttinə yaxınlaşıb, yemək götürür. Əməkdaşımız isə müştəriyə toyuğun hər-hansı bir hissəsini qoyur. Müştəri yemək servis ediləndən sonra, toyuğun sevmədiyi hissəsini götürüb, ümumi yemək qazanının içinə atmışdı. Bu, məncə mədəniyyətə sığmayan bir şeydir.
Daha əvvəllər insanlar düşünürdülər ki, onlar gəlib günorta yemək yeyirlərsə, onlara restoran xidməti göstərilməlidir, eyforiya yaşayırdılar. Bu isə hər zaman müştəri ilə problem yaşadırdı. Yavaş-yavaş insanlar qəbul etdilər ki, nahar etmək eyforiya yaşamaq deyil. Sadəcə sizin gündəlik yemək ehtiyacınızı ödəmək üçündür”.
Ulduz Aslan əlavə edib ki, son beş ildə sürətli şəkildə insanlar bu mərhələlərdən keçə bildilər.
