28-29 mart tarixləri arasında İngiltərənin Mançester şəhərində keçirilmiş Soccerex Avropa Forumunda FIFA U-17 qadınlararası dünya çempionatı Azərbaycan 2012 təqdim edilmişdir. İki gün ərzində davam edən 1500-dən çox nümayəndələrin iştirak etdiyi tədbirdə dünya çempionatının stendi iştirakçılarda maraq doğurmuşdur. 2 gün davam edən sərgidə çempionatın stendi bir sıra məşhur futbolçular və məşqçilər tərəfindən ziyarət olundu. İki gün ərzində dünya futbolunun məşhur simalarından Patrik Vieira, Rafael Benitez, Şay Given, Gaizka Mendieta, David Dien, Emmanuelle Petit və digər şəxslər çempionat barəsində ətraflı məlumat alaraq öz dəstəklərini sərgiləmişdir. Həmçinin, Bir sıra futbol klubları, şirkətlər, media nümayəndələri, federasiyalar və digər çempionatların Yerli Təşkilat Komitələrinin nümayəndələri ilə səmərəli müzakirələr həyata keçirilmişdir.

Tədbirin ikinci günündə FIFA U-17 qadınlararası dünya çempionatı Azərbaycan 2012-nin Yerli Təşkilat Komitəsinin Koordinatoru Nərgiz Məmmədova və Könüllülük üzrə Direktoru Vüqar Rüstəmli tərəfindən 100-ə yaxın tədbir iştirakçılarına xüsusi təqdimat edilmişdir. Təqdimatın keçirilmə məqsədi çempionatın hazırlıq prosesi haqqında insanlara məlumat vermək, beynəlxalq media, idman qurumları və başqa əlaqəli müəssisələrlə - müxtəlif maraqlı tərəflərlə əməkdaşlıq imkanlarını işıqlandırmaq və könüllülük imkanları haqqında məlumat vermək idi.