Dreams istifadəçilərinə avatar və ya profil şəkilləri təqdim etməkdənsə, istifadəçilərin xəyallarını fotoşəkillərə çatdırmağı hədəfləyir.
Facemark.az xarici mənbəyə istinadən xəbər verir ki, Snapchat-ın süni intellektlə dəstəklənən chatbot My AI-nın aprel ayında bütün istifadəçilər üçün açıldığı elan edilmişdi. May ayında ödənişli abunəçilərə My AI Snaps funksiyasını açan şirkət, My AI-nin istifadəçilərə mətn əsaslı mesajlardan kənarda vizual Snaps göndərməsinə yol açdı. Snap indi Dreams adlı yeni süni intellekt xüsusiyyəti ilə yenidən gündəmdədir.
Şirkət ötən aylarda Alessandro Paluzzi tərəfindən kəşf edilən Dreams xüsusiyyətinin əhatə dairəsini genişləndirməyə davam edir. Bir müddətdir ki, süni intellektlə dəstəklənən görüntü istehsalına diqqət yetirən şirkət, test versiyasındakı xüsusiyyətlərlə istifadəçilərə özlərini və dostlarını ehtiva edən şəkillər hazırlamağa imkan verir. Sözügedən obrazların yaradıcılıq fonlarının da olacağı bildirilir.
Tərtibatçı Stiv Moserin sözlərinə görə, Snap istifadəçilərə öz şəkillərini yükləmək və əmrlərlə yeni fotolar əldə etmək imkanı verən funksiyalar üzərində işləməyə davam edir. Snap-ın bu yanaşması son vaxtlar tətbiq mağazalarını ələ keçirmiş süni intellekt avatar proqramlarını xatırladır.
2022-ci ilin noyabrında Sehrli Avatarlar funksiyasını istifadəyə verən Lensa AI istifadəçilərin böyük marağına səbəb oldu. Oktyabr ayında 219 min yükləmə alan tətbiq noyabrda 631 faiz artımla 1,6 milyon dəfə endirilib. Eyni şəkildə, Remini adlı avatar proqramı TikTok-da viral oldu. Şəkillərini Remini-yə yükləməklə istifadəçilər peşəkar LinkedIn profil şəkli və ya yaradıcı avatar əldə edirlər. Remini keçən ay 30 gün ərzində dünya üzrə 22 milyondan çox yükləmə aldı.
Dreams isə istifadəçilərinə avatar və ya profil şəkilləri təqdim etməkdənsə, istifadəçilərin xəyallarını fotoşəkillərə çevirməyi hədəfləyir. Beləliklə, istifadəçiləri fotoşəkillər vasitəsilə fantastik yerlərdə tapmaq olar. Dreams funksiyasının qüsursuz işləməsi üçün aydın fotolardan istifadə edilməlidir. Fərqli işıqlandırma və bucaqlı fotoşəkilləri yüklədikdə daha yaxşı nəticələr əldə edə bilərsiniz.
Bu xüsusiyyətə əlavə olaraq, Dreams with friends xüsusiyyəti istifadəçilərə iki dostunu daxil etməklə süni intellektlə dəstəklənən xəyali şəkillər yaratmağa imkan verir.
Snapchat tətbiqində Dream Packs adlı satınalma ilə bağlı ifadələr də şirkətin bir müddət sonra bu xüsusiyyəti gəlir mənbəyi kimi yerləşdirə biləcəyini göstərir. Snap hazırda bu yeni xüsusiyyətlərlə bağlı hər hansı rəsmi açıqlama verməkdən çəkinir.
