"Disney" aprelin 7-dən etibarən Rusiya kinoteatrlarında öz filmlərinin yayımını tamamilə dayandıracaq. Bu barədə “Bulletin of the Film Distributor” nəşri öz Telegram kanalında məlumat yayıb.

Facemark.az xarici mənbəyə istinadən xəbər verir ki, martın əvvəlində "Disney" Rusiyada bütün fəaliyyəti, o cümlədən yeni filmlərin nümayişi və yayımı, video xidmətləri üçün layihələrin lisenziyalaşdırılmasını dayandıracağını bəyan edib.

Şirkətin qərarı öz telekanallarının yayımına, "Disney Cruise Line"in fəaliyyətinə və "National Geographic" jurnalının nəşrinə də təsir edib. Media konqlomeratının strukturuna "Pixar", "Marvel Studios", "Lucasfilm", "20th Century Studios" və digər kinostudiyalar daxildir.

Bundan əvvəl Rusiyanın striminq xidmətləri Rusiyada daha əvvəl fəaliyyətini dayandıran böyük kinostudiyaların yeni filmlərinin nümayişi üçün lisenziya satışını dayandırdıqları barədə məlumat vermişdilər.